არა წადილი შენი, არამედ როგორც ინებებს ღმერთი
(წმ. სერაფიმე ვირიცელის ცხოვრებიდან)
ვასილი ნოკოლოზის ძეს კომერციული საქმეების გამო ხშირად უხდებოდა უცხოეთში ყოფნა. უკანასკნელი მოგზაურობა მეტად ხანგრძლივი იყო, ამბობენ ათონის მთაზეც ჩავიდაო. როგორც ჩანს, უკვე მაშინ გაუჩნდა სურვილი თავი სრულად მიეძღვნა ღვთისა და მოყვასის მსახურებისთვის. საბოლოო გადაწყვეტილების მიღებაში დაეხმარა შემთხვევა, რომელიც, ცხადია, ღვთის განგებით მოხდა.
როდესაც ვასილი ნიკოლოზის ძე უცხოეთიდან დაბრუნდა, პეტერბურგის სადგურში პირადი მეეტლე დახვდა და სახლისკენ წაიყვანა. ერთ-ერთ ქუჩაზე ვასილიმ ქვაფენილზე ჩამომჯდარი ძონძებით შემოსილი გლეხი დაინახა, რომელიც ხმამაღლა იმეორებდა:
– არა წადილი შენი, არამედ როგორც ინებებს ღმერთი!
ვასილი ნიკოლოზის ძემ იგრძნო, რომ ამ გლეხს უნდა დალაპარაკებოდა, კარეტაში მიიწვია და გამოკითხვა დაუწყო. გლეხი მოუყვა, რომ სოფელში ჰყავდა ტიფით დასნეულებული შვიდი შვილი, ცოლი და მამა. მეზობლებს დაავადების ეშინოდათ და მათ სახლში არ შედიოდნენ. მამამ უთხრა:
– მხოლოდ შენ ხარ ჩვენ შორის ჯანმრთელი. წადი, ცხენი გაყიდე, ახლა გაზაფხულია, ვინმე იყიდის მინდვრის სამუშაოებისთვის. აღებული ფულით ძროხა იყიდე, იქნებ იმის საშუალებით ცოცხლები გადავრჩეთ.
გლეხმა წაიყვანა ცხენი ქალაქში, გაყიდა, მაგრამ ფული წაართვეს, რადგან შიმშილისგან ძალიან დაუძლურებული იყო და წინააღმდეგობა ვერ გაუწია. მაშინ ის ქვაფენილზე ჩამოჯდა და ატირდა, შეუძლებელი იყო სახლში ხელცარიელი დაბრუნება. ის თავისთვის იმეორებდა:
– არა წადილი შენი, არამედ როგორც ინებებს ღმერთი!
ვასილი ნიკოლოზის ძე მასთან ერთად ბაზარში მივიდა, იყიდა წყვილი ცხენი, ურემი, რომელიც პროდუქტებით დატვირთა, გამოაბა ძროხა, მიიყვანა გლეხი ურემთან და ხელში სადავე დააჭერინა. ის უარზე იყო, ვერ იჯერებდა ბედნიერებას, მაგრამ პასუხად გაიგონა:
– არა წადილი შენი, არამედ როგორც ინებებს ღმერთი!
ვასილი ნიკოლოზის ძე მივიდა თავის სახლში, გაუშვა მეეტლე და ვიდრე მეუღლესთან წავიდოდა, პარიკმახერი გამოიძახა. პარიკმახერმა სთხოვა, დაბრძანებულიყო სავარძელში, მაგრამ ვასილი აღელვებული მიმოდიოდა ოთახში და ხმამაღლა იძახდა:
– არა წადილი შენი, არამედ როგორც ინებებს ღმერთი!
პარიკმახერმა ისევ შესთავაზა თავისი სამსახური, მაგრამ უფროსი ისევ იმეორებდა:
– არა წადილი შენი, არამედ როგორც ინებებს ღმერთი!
უეცრად პარიკმახერი მუხლებზე დაეცა:
ბატონო, საიდან გაიგეთ ჩემი უბადრუკობის შესახებ? – და აღიარა, რომ მისი მოკვლა და გაძარცვა სურდა. ვასილიმ უბრძანა, ქალაქიდან გადახვეწილიყო.
ამ შემთხვევის შემდეგ ვასილი ნიკოლოზის ძემ თავისი ქონების დიდი ნაწილი დაარიგა, გულუხვად შესწირა პეტერბურგის მონასტრებს, ასევე დიდი თანხა თავის თანამშრომლებს დაუტოვა.
წლების შემდეგ ის ღვთივგანბრძნობილი მოძღვარი (სტარეცი) გახდა – მამა სერაფიმე ვირიცელი. ათასობით ადამიანს შეეწია ცხონებაში წმიდა საკვირველთმოქმედი სერაფიმე.
|
