ეკლესიური ცხოვრებისა და საეკლესიო წესებისათვის

თავი 8

სხვა საეკლესიო საკითხები

7. როგორ დავეხმაროთ მიცვალებულს?

ქრისტიანის დაკრძალვის დღეს მღვდელი აღასრულებს მიცვალებულის წესის აგებას, ხოლო გარდაცვალებიდან მესამე, მეცხრე და მეორმოცე დღეს – პანაშვიდს (პირველ დღედ ითვლება გარდაცვალების დღე). 40 დღის განმავლობაში საჭიროა მოწყალების გაცემა მიცვალებულის სახელზე, ფსალმუნების კითხვა მისი სულის შესაწევნელად, მოხსენიება წირვის დროს და პირად ლოცვებში; 40 დღის გასვლის შემდეგაც სასურველია – მიცვალებულის მოხსენიება წირვაში, პანაშვიდზე და პირად ლოცვებში; ეკლესიაში დაწესებულია მიცვალებულთა მოსახსენებელი დღეები, როცა სრულდება საზოგადო პანაშვიდი, ხოლო მიცვალებულთა ახლობლები მათ სახელზე აკეთებენ საკურთხს, ანუ საჭმელს, რომელსაც სწირავენ ეკლესიას და გლახაკებს. საჭიროა საკურთხი გაკეთდეს ნაკურთხი მარილით, ზეთით და ღვინით. ძალიან სასურველია ნებისმიერ დროს მიცვალებულის სახელზე მოწყალების გაღება – ეკლესია-მონასტრებისთვის, გლახაკებისა და ქვრივ-ობლებისთვის (მოწყალება შეიძლება იყოს თანხის სახით, საკვების, ტანსაცმლის და სხვ.). წმ იოანე ოქროპირი ამბობს: „ამაო არაა შესაწირავი მიცვალებულთათვის, ამაო არაა ლოცვები, ამაო არაა მოწყალებანი: ეს ყოველივე სული წმიდამ დააწესა, იმისთვის, რომ ჩვენ ერთიმეორის საშუალებით სარგებელი მიგვეღო“.[1]

შემდეგი

სარჩევი